काल कोचीनला होतो. पहिल्यांदाच तिथे गेलो होतो. भारतातल्या बहुतेक विमानतळांवर (अगदी छोट्यासुद्धा) आतापर्यंत प्रवास झाला आहे. सगळे विमानतळ हे एकाच साच्यातले आहेत. तशाच गोल शेड्स आणि काचेचे स्ट्रक्चर. तशाच लिफ्ट्स, तसेच एस्केलेटर, तशीच रंगसंगती. हल्ली विमानतळाचे बरेचसे भाग प्री-फॅब्रिकेटेड मिळत असणार, म्हणून जगभरचे विमानतळ एकसारखेच दिसतात. आकारात फक्त कमी-जास्त.
कोचीनला सुखद धक्का बसला! एखादे जुने रेल्वे स्टेशन वाटेल अशी इमारत; पण अतिशय देखणी. प्रशस्त दालने, लाकडी बांधणीचा भरपूर वापर, प्रवाशांना बसायच्या खुर्च्यादेखील नेहमीच्या शरीर घरंगळायला लावणाऱ्या स्टीलच्या नसून, लाकडाच्या आहेत. अतिशय आरामशीर आणि सुखद!
बाहेरच कुचिपुडी आणि इतर नृत्यप्रकारांचे अतिशय सुंदर मोठे देखावे असलेले दालन. (यांच्या तुलनेत पुण्याच्या विमानतळावर ज्या २ ढोल बडवणाऱ्या फेटेधारी बायकांचे पुतळे ठेवलेत त्यांना ‘भिकार’ म्हटलं तर त्यांची स्तुती केल्यासारखं होईल!)
इथले इंटरनॅशनल टर्मिनल आणखीनच उत्कृष्ट आहे असे समजले! आता तिथून एकदा भारताबाहेर जायला पाहिजे. केरळच्या ३० देशांमधल्या सुमारे १० हजार व्यावसायिकांनी भांडवल टाकून सरकारच्या बरोबरीने हा विमानतळ निर्माण केला आहे, हे तर पचायला धक्कादायकच आहे! एकंदरित कोचीनचा विमानतळ हा भारतातला सर्वोत्कृष्ट विमानतळ आहे.
